1ܒܲܣ ܟܲܕ ܐܝܼܬ ܠܲܢ ܐܲܢܹܐ ܩܵܘܠܹ̈ܐ؛ ܡܘܼܚܸܒܝܼ̈؛ ܕܵܟܼܵܚ ܓܵܢܲܢ ܡ̣ܢ ܟܠܵܗܿ ܛܲܡܐܘܼܬܵܐ ܕܒܸܣܪܵܐ ܘܕܪܘܼܚܵܐ؛ ܘܬܲܡܸܡܵܚ ܩܲܕܝܼܫܘܿܬܵܐ ܒܙܕܘܼܥܬܵܐ ܕܐܲܠܵܗܵܐ. 2ܩܵܒܿܠܘܿܢ ܠܲܢ؛ ܒܐَܢܵܫܵܐ ܠܵܐ ܙܠܸܡܠܲܢ؛ ܠܐَܢܵܫܵܐ ܠܵܐ ܡܘܼܚܪܸܒܼܠܲܢ؛ ܠܐَܢܵܫܵܐ ܠܵܐ ܥܒܸܕܠܲܢ ܠܹܐܒܵܐ. 3ܠܹܐ ܝَܠܵܗ̇ ܠܓܘܼܢܵܗܟܵܪܘܼܬܵܐ ܒܹܐܡܵܪܵܐ ܝܘܸܢ؛ ܣܵܒܵܒ ܕܩܵܕَܡܵܝܬܵܐ ܐَܡܸܪܝܼ؛ ܕܒܠܸܒܲܢ ܝܼܬܘܿܢ؛ ܠܸܡܝܵܬܵܐ ܘܠܸܚܵܝܵܐ ܡܸܚܕܵܕܹܐ. 4ܪܵܒܵܐ ܒܸܣܬܵܝܘܼܬܵܐ ܐܝܼܬ ܠܝܼ ܠܟܸܣܠܵܘܟܼܘܿܢ؛ ܘܪܵܒܵܐ ܫܘܼܒܼܗܵܪܵܐ ܐܝܼܬ ܠܝܼ ܣܵܒܵܒ ܕܝܼܵܘܟܼܘܿܢ؛ ܘܡܸܠܝܵܐ ܝܘܸܢ ܝܵܗَܒܲܠܬܵܐ ܕܠܸܒܵܐ؛ ܒܸܙܝܵܕܵܐ ܝܘܸܢ ܪܵܒܵܐ ܒܚܲܕܘܼܬܵܐ ܒܟܠܵܝܗܝ ܐܘܼܠ̈ܨܵܢܲܢ. 5ܣܵܒܵܒ ܐܘܼܦ ܟܲܕ ܐَܬܹܐܠܲܢ ܠܡܵܩܹܕܘܿܢܝܼܵܐ؛ ܐܘܼܦ ܚܲܕَ ܢܝܵܚܵܐ ܠܵܐ ܗَܘܹܐܠܹܗ ܠܦܲܓܼܪܲܢ؛ ܐܸܠܵܐ ܒܟܠ ܡܸܢܕܝܼ ܦܸܫܠܲܢ ܡܘܼܠܝܸܨܹܐ؛ ܡ̣ܢ ܠܒܲܕܲܪ ܦܠܵܫܹ̈ܐ ܘܠܓܵܘܵܝܝܼ ܙܕܘܼܥܝܵܬܹ̈ܐ. 6ܐܸܠܵܐ ܐܲܠܵܗܵܐ؛ ܗ̇ܘ ܕܟܹܐ ܝܵܗَܒܸܠ ܠܸܒܵܐ ܠܡܵܟܝܼܟܹ̈ܐ؛ ܝܘܼܗَܒܼܵܚܠܹܗ ܠܸܒܵܐ ܒܐَܬܵܝܬܹܗ ܕܛܸܛܘܿܣ. 7ܘܠܵܐ ܒܐَܬܵܝܬܹܗ ܗܲܪ؛ ܐܸܠܵܐ ܐܘܼܦ ܒܝܵܗَܒܲܠܬܹܗ ܕܠܸܒܵܐ؛ ܗ̇ܝ ܕܦܸܫܠܹܗ ܝܘܼܗَܒܼܵܐ ܠܸܒܵܐ ܒܝܼܵܘܟܼܘܿܢ؛ ܣܵܒܵܒ ܕܩܲܡ ܡܲܫܚܸܕ ܠܲܢ ܥܲܠ ܚܘܼܒܵܘܟܼܘܿܢ ܓܘܼܪܵܐ ܘܬܵܙܝܼܵܘܟܼܘܿܢ؛ ܘܩܲܝܪܲܬܵܘܟܼܘܿܢ ܒܘܼܬ ܕܝܼܝܼ؛ ܗܲܕܟܼܵܐ ܕܚܲܕܘܼܬܵܐ ܙܵܘܕܵܐ ܗَܘܹܐܠܵܗ̇ ܠܝܼ. 8ܣܵܒܵܒ ܐܵܦܸܢ ܩܲܡ ܡܲܦܫܸܡܸܢܵܘܟܼܘܿܢ ܒܐܸܓܲܪܬܵܐ؛ ܠܹܐ ܝܘܸܢ ܒܦܫܵܡܵܐ؛ ܐܵܦܸܢ ܕܦܫܸܡܠܝܼ؛ ܣܵܒܵܒ ܒܸܚܙܵܝܵܐ ܝܘܸܢ ܕܗ̇ܝ ܐܸܓܲܪܬܵܐ ܩܲܡ ܡܲܦܫܸܡܵܐ ܠܵܘܟܼܘܿܢ؛ ܐܵܦܸܢ ܒܚܕܵܐ ܣܵܥܲܬ. 9ܐܵܕܝܼܵܐ ܒܸܚܕܵܝܵܐ ܝܘܸܢ؛ ܠܵܐ ܣܵܒܵܒ ܕܦܫܸܡܠܵܘܟܼܘܿܢ؛ ܐܸܠܵܐ ܣܵܒܵܒ ܕܦܫܸܡܠܵܘܟܼܘܿܢ ܠܬܵܝܒܼܘܼܬܵܐ؛ ܣܵܒܵܒ ܕܦܫܸܡܠܵܘܟܼܘܿܢ ܐܲܠܵܗܵܐܝܼܬ؛ ܕܵܐܟܼܝܼ ܕܒܡܸܢܕܝܼ ܠܵܐ ܩܵܒܿܠܝܼܬܘܿܢ ܚܘܼܣܪܵܢܵܐ ܡܸܢܲܢ. 10ܣܵܒܵܒ ܦܫܵܡܬܵܐ ܐܲܠܵܗܵܐܝܼܬ ܬܝܵܒܼܘܼܬܵܐ ܠܦܘܼܪܩܵܢܵܐ ܟܹܐ ܦܵܠܚܵܐ؛ ܕܠܹܐ ܕܵܝܪܵܐ؛ ܐܝܼܢܵܐ ܦܫܵܡܬܵܐ ܕܥܵܠܡܵܐ ܡܵܘܬܵܐ ܟܹܐ ܦܵܠܚܵܐ. 11ܣܵܒܵܒ ܗܵܐ؛ ܐܵܗܵܐ ܕܦܫܸܡܠܵܘܟܼܘܿܢ ܐܲܠܵܗܵܐܝܼܬ؛ ܟܡܵܐ ܦܠܸܚܠܵܗ ܒܝܼܵܘܟܼܘܿܢ ܚܵܒܵܛܘܼܬܵܐ؛ ܗܹܐ؛ ܐܘܼܦ ܝܵܗَܒܲܠܬܵܐ ܕܓ̰ܘܼܘܵܒ؛ ܘܟܲܪܒܵܐ؛ ܘܙܕܘܼܥܬܵܐ؛ ܘܚܘܼܒܵܐ ܓܘܼܪܵܐ؛ ܘܩܲܝܪܲܬ؛ ܘܬܘܼܥܠܵܐ. ܘܒܟܠ ܡܸܢܕܝܼ ܡܘܼܚܙܹܐܠܘܟܼܘܿܢ ܓܵܢܵܘܟܼܘܿܢ ܕܕܸܟܼܝܹ̈ܐ ܝܬܘܿܢ ܒܐܵܗܵܐ ܫܘܼܠܵܐ. 12ܗܲܕܟܼܵܐ ܐܵܦܸܢ ܕܟܬܸܒܼܠܝܼ ܐܸܠܵܘܟܼܘܿܢ؛ ܠܹܐ ܗَܘܵܐ ܣܵܒܵܒ ܕܥܵܒܼܕܵܢܵܐ ܕܓܢܵܗܵܐ؛ ܐܘܼܦ ܠܵܐ ܣܵܒܵܒ ܕܗ̇ܘ ܕܥܒܼܝܼܕܬܵܐ ܝَܠܵܗ̇ ܓܢܵܗܵܐ ܒܝܹܗ؛ ܐܸܠܵܐ ܕܦܵܝܫܵܐ ܝܕܥܝܼܬܵܐ ܠܟܸܣܠܵܘܟܼܘܿܢ ܩܵܕَܡ ܐܲܠܵܗܵܐ ܚܵܒܵܛܘܼܬܵܘܟܼܘܿܢ ܒܘܼܬ ܕܝܼܲܢ. 13ܣܵܒܵܒ ܕܐܵܗܵܐ ܦܸܫܠܲܢ ܝܘܼܗَܒܹܐ ܠܸܒܵܐ؛ ܘܥܲܡ ܫܩܲܠܬܲܢ ܕܠܸܒܵܐ ܙܵܘܕܵܐ ܚܕܹܐܠܲܢ ܒܚܲܕܘܼܬܹܗ ܕܛܸܛܘܿܣ؛ ܕܦܸܫܠܵܗ̇ ܡܘܼܢܝܸܚܬܵܐ ܪܘܼܚܹܗ ܡ̣ܢ ܟܠܵܘܟܼܘܿܢ. 14ܣܵܒܵܒ ܐܸܢ ܒܡܸܢܕܝܼ ܥܒܼܝܼܕ ܠܝܼ ܫܘܼܒܼܗܵܪܵܐ ܐܸܠܹܗ ܣܵܒܵܒ ܕܝܵܘܟܼܘܿܢ؛ ܠܵܐ ܢܚܸܦܠܝܼ؛ ܐܸܠܵܐ ܐܲܝܟܼ ܕܒܟܠ ܡܸܢܕܝܼ ܣܲܪܲܣܬܘܼܬܵܐ ܗܘܼܡܙܸܡܠܲܢ ܥܲܡܵܘܟܼܘܿܢ؛ ܗܲܕܟܼܵܐ ܐܘܼܦ ܫܘܼܒܼܗܵܪܲܢ ܕܠܟܸܣ ܛܸܛܘܿܣ ܒܣܲܪܲܣܬܘܼܬܵܐ ܦܸܫܠܹܗ ܡܘܼܫَܟ̰ܚܵܐ. 15ܘܐܘܼܦ ܪܲܚܡܘܼܗܝ ܒܘܼܫ ܙܵܘܕܵܐ ܙܝܼܕܹܐ ܝܢܵܐ ܠܟܸܣܠܵܘܟܼܘܿܢ؛ ܟܲܕ ܒܸܕܟܼܵܪܵܐ ܝܠܹܗ ܡܲܨܝܲܬܬܵܐ ܕܟܠܵܘܟܼܘܿܢ؛ ܕܒܙܕܘܼܥܬܵܐ ܘܒܪܲܬܪܲܬܬܵܐ ܩܘܼܒܸܠܵܘܟܼܘܿܢ ܐܸܠܹܗ. 16ܒܸܚܕܵܝܵܐ ܝܘܸܢ ܕܒܟܠ ܡܸܢܕܝܼ ܡܵܪܹܐ ܗܹܒܼܝܼ ܝܘܸܢ ܒܝܼܵܘܟܼܘܿܢ.